చలనశీలత

జీవితం కేవలం

పరుపు బండ మీద

పరుగులుపెట్టే బండి చక్రం కాదు

అట్లని

కంకర రాళ్ళ గతుకుల రోడ్డు మీద

నడిచే నగ్న పాదాల నడకా కాదు

అడుగు అడుక్కీ మధ్య వ్యత్యాసం

కొన్ని హ్రస్వాలూ మరిన్ని దీర్ఘాలూ

ఒకసారి ముందుకూ మరోసారి వెనక్కూ

నిప్పుల మీదో మంచు దిమ్మె మీదో

కటిక చీకటి లోనో  పండు వెన్నెల్లోనో

అడుగు లో అడుగు అడుగు వెనకాల అడుగు  

కదలిక బతుక్కి ప్రాణవాయువు

చలన శీలతే జీవితం