ప్రేమ-స్నేహం

తొలి చూపులో ప్రేమించడం 
మొదటి పరిచయంలోనే స్నేహించడం సులభమే 
సహజంగా స్వచ్చంగా వాటిని కొనసాగించడమే కష్టం 

వాత్సవానికి ఆ రెండు నీ చేతుల్లో ఉన్నాయా 

ఒక చేయితో చప్పట్లు సాధ్యం కానట్టు 
ప్రేమకు ఒక మనసు చాలదు 
స్నేహానికి ఒక మనిషీ చాలడు

ఆ రెంటికి మనుషులు కావాలి
ఆత్మలున్న మనుషులు కావాలి 

ప్రేమలోనూ స్నేహంలోను 
ఇవ్వడం పుచ్చుకోవడం రెండు వుంటాయి 

ప్రేమకు అనంతమైన భావోద్వేగమూ 
స్నేహానికి నిర్మలమైన స్వచ్చతా  కావాలి 

కాని 
స్వికరించటమె అలవాటుగా మారిన మనుషుల మధ్య  
ప్రేమ స్నేహం నీ చేతుల్లో ఉన్నాయా 

'నేను' నుంచి 'మనం' దాకా 
మారడానికి సిద్ధంగా లేని మనుషుల మధ్య 
ఆ రెండు ఒయాసిస్సులు కావా 

ఒకటి కాదు రెండు కాదు అన్నీ
 'నేను' గా మారిన చోట 
అన్నీ 'నావి' గా మారిన చోట 
ప్రతిదీ నగదు విలువైన చోట ప్రేమ స్నేహం మూర్ఖత్వమే
ప్రేమించడం స్నేహించడం అర్థంలేని మాటలే 

కానీ 
తడి వున్న వాణ్ని, వేళ్ళున్న వాణ్ని 
ఆ రెండు లేకపోతే దిక్కు లేని వాన్నవుతాను 
ఈ లోకమే దిక్కు లేని దవుతుంది.
-ఆనంద్ వారాల 
9440501281

ఒక్కో సారి

ఒక్కోసారి నిలిచిపోవడం 

కాల్రెక్కలు కుదేసినట్టు కూలబడిపోవడం 

మంచిదేనేమో 

ఎట్లా చెప్పగలం 

కూలబడ్డవాడు తిరిగి కూడదిసుకొడని 

సర్వశక్తుల్ని ఒక్కటొక్కటి గా చేరదిసుకుని 

నిలుచున్న చోటి నుంచి నింగి దాక ఎగరడని

ఎట్లా చెప్పగలం 

ఒక్కోసారి వెనక్కి తిరగడం 

ముందు శూన్యమై నిలబద్దచోటే కూలబడడం 

మంచిదేనేమో

ఎట్లా కాదనగలం 

కూలబడ్డ వాడు నిలబడడని

ఎదురు తిరగడని

పునరుత్సహాన్ని పుంజుకుని 

ఎదురు దాడి చేయడని

మనిషి  దేముంది 

పోట్రాయి తగులుతుంది బొక్క బోర్లా పడతాం

ఆయన లేచి నిలబడతాడు 

ఉవ్వెత్తున అలోస్తుంది

తలొంచుకుని క్షణ కాలం నిలిచి తలెత్తుకుంటాడు

చూరు తగిలి తల బొప్పి కడుతుంది 

చేత్తో తడుముకుంటూ 

ముందుకు సాగుతాడు 

మనిషి దేముంది 

ఆకులు రాలిన చెట్టు లాంటి వాడు 

ఎండిన మోట బావి లాంటి వాడు 

మళ్లీ చిగురిస్తాడు 

 ఉట లోంచి  ఎగిసిపడ్డ తేట నీరులా 
ఉప్పెన అవుతాడు 
ఒక్కోసారి 
నిలిచి పోవడం లోంచే 
నిలువెత్తుగా ఎగిసి పడడానికి సత్తువ వొస్తుంది 
తలెత్తుక తిరగడానికి 
ప్రాణ మొస్తుంది
-ఆనంద్ వారాల 
9440501281

కాన్చిటి' చౌరాస్తా అనబడే ఓ తెలంగాణ చౌరస్తా

కాన్చిటి'  చౌరాస్తా 

అనబడే ఓ తెలంగాణ చౌరస్తా 

ఎన్ని పాదాల స్పర్శతో పునితమయిందో 

ఎందరు మనుషుల కదలికలతో చైతన్యవంత మయిందో 

వాళ్ళు లేకుంటే దానికి అందమేముంది 

మనుషులందరూ కదులుతున్న చెట్లు 

ఉద్రేక, ఉద్యమ, ఉద్వేగ గాలిని

ఆవాహనం చేసుకున్న వారంతా 

విచ్చుకుంటున్న మొగ్గల్లా 

విరబూస్తున్న పువ్వుల్లా 

ఒకరినొకరు పెనవేసుకుంటూ 

కూడలి ఎంత బాగుంటుంది 

స్తబ్దత లేదు,జడత్వం లేదు,నిశబ్దం లేదు,

కాంక్షలు  మనషులు అవడం 

మనుషులు మహోద్రేకంతో మమేకవడం 

గొప్ప ప్రేమతో భావాల సంయమనంతో 

నాలుగు దిక్కుల్నించి కదుల్తున్న ప్రవాహమవడం 

ఎన్నేళ్ళుగానో ఎన్ని'బండి కానీలకు '

చిట్టీలు కట్టిన 'కాన్చీటి' చౌరస్తా

నేడు జీవ మయి హృదయమై 

మనుషులందర్నీ సజివుల్ని చేస్తోంది 

తాను నిత్య చైతన్య వంత మౌతోంది 

-ఆనంద్ వారాల 

9440501281

విషాదం

విషాదం 

ప్రవాహం నిత్య సత్యం 

కదలిక ఒక వాస్తవం 

చలన శిలతే జీవితం 

కానీ విషాదం ఏమిటంటే 

నిరంతర ల్యాబ్ డబ్ ల ప్రవాహం లో 

రెంటి మధ్య లయ బద్ధంగా విన బడుతున్న నిశబ్దము 

జీవితంలో భాగమే కదా 

నిజంగా 

నిరంతర కదలికలో ఓ క్షణం 

విరామమొస్తే ......

స్థాబ్దతా నిశ్చలనము శూన్యమే మన ముందు  నిలబడతాయి 

అది నిజంగా ఏమి స్థితి 

ఎటూ కదలడానికి వీల్లేదు 

ఎటూ మెదలదానికి వీల్లేదు 

మైళ్ళకు మైళ్ళు నడవాలనిపిస్టది

ఉరుకులు వేయాలని పిస్తది

అందరిలో కలవాలని పిస్తది

అందరిని అవ్వాలనిపిస్తధి

మనం అనుకున్నట్టుగా చేయలేకపోవడం

మనం అనుకున్నట్టుగా ఉండలేక పోవడం 

మరణం కన్నా విషాదం 

-ఆనంద్ వారాల 

9440501281

నో మాన్స్ లాండ్

నో మాన్స్ లాండ్ 

సరిహద్దుకు అవతల 

అది ఎవరికీ చెందిన స్థలం కాదు 

నన్ను చూడ్డానికి వచ్చావు 

గాలి నియంత్రించిన గదిలో

పడి వున్నాను 

నిన్ను చూస్తూనే వున్నాను 

కూడబలుక్కున్న మాటలు 

నీ కళ్ళల్లో ఓ కన్నీటి చార 

ఒద్దొద్దు నిశ్చింతగా ఉండొచ్చు 

నా పెదాల పై చిరు నవ్వు చార 

రక్తం శుభ్రమవుతున్నదంతే 

నా మనసూ శుభ్రమవుతున్నది 

స్ఫటికంలా అంతా స్వచ్చ మవుతున్నది 

అన్ని సరిహద్దులు దాటి వచ్చాం 

నువ్వు నేను ఒకే రాడార్ లో వున్నాం 

దుఖం వద్దు, వేదన వద్దు 

వీడ్కోలు తెలీని సాంగత్యంలో 

ఇక నిర్భయంగా కలిసి ఉందాం 

-ఆనంద్ వారాల 

9440501281